fbpx

شمعنتها نقبل المسيح في حياتي؟

ديما نقولو ونأكدو انّو الايمان بيسوع المسيح هو الطريق الوحيد لنجاة الانسان من حكم الموت. أما شنوة معناها الايمان بيسوع المسيح مخلّص في حياتنا؟

الايمان بيسوع المسيح يعني انّو معادش نعملو على رواحنا وتولّي ثقتنا بيه هو في كل شي وانّو هو اللّي باش يوصّلنا للسماء. أحنا منجموش ندخلو للسما بأعمالنا الباهية أكاهو على خاطر قد ما نكونو صالحين، أعمالنا تقعد محدودة ومتنجمش تصلّح حكم الموت اللّي علينا على خاطرنا ناس مذنبين في حق ربي من اول ما نتولدو. الكتاب المقدّس يعلّمنا:

«لَهُ يَشْهَدُ جَمِيعُ الأَنْبِيَاءِ أَنَّ كُلَّ مَنْ يُؤْمِنُ بِهِ يَنَالُ بِاسْمِهِ غُفْرَانَ الْخَطَايَا». أعمال10: 43

«الَّذِي فِيهِ لَنَا الْفِدَاءُ، بِدَمِهِ غُفْرَانُ الْخَطَايَا، حَسَبَ غِنَى نِعْمَتِهِ». أفسس1: 7

وقتلّي الواحد يؤمن انّو يسوع المسيح هو الطريق باش ذنوبو تتغفر، وقتها تبدا في داخلو حياة جديدة.

«إِذاً إِنْ كَانَ أَحَدٌ فِي الْمَسِيحِ فَهُوَ خَلِيقَةٌ جَدِيدَةٌ. الأَشْيَاءُ الْعَتِيقَةُ قَدْ مَضَتْ. هُوَذَا الْكُلُّ قَدْ صَارَ جَدِيداً». كورنثوس الثانية 5: 17

ووقتها يولّي تابع ليسوع المسيح ويعتمد عليه في كل أمور حياتو. السيد المسيح وعد انّو كل اللّي يؤمن بيه روح الله يسكن فيه ويرشدو ويعلمو كل شي.

«أَمَّا الرُّوحُ الْقُدُسُ فَإِنَّهُ يُعَلِّمُكُمْ كُلَّ شَيْءٍ، وَيُذَكِّرُكُمْ بِكُلِّ مَا قُلْتُهُ لَكُمْ.» الانجيل: يوحنا14: 26

ربّي يعلّمنا طريقو وحقّو وينظّف أفكارنا من كل حاجة خايبة وغالطة ويورّينا الصحيح. ووقتها معادش نكونو عبيد للذنوب.

لازم نعرفو انّو وقت نقول انّي قبلت المسيح وذنوبي تغفرت هذا ما يعنيش انّو نعمل اللّي نحب ونعيش كيما نحب وأهاوكا قيّد على ذنوبي مغفورة. هذا غالط ومش صحيح. أما الحقيقة هي وقت اللّي نقبل بالحق المسيح في حياتي ونفهم اللّي عملو على خاطري والثمن الغالي اللّي تتدفع باش انا نعيش حر، وقتها أنا نولّي انسان جديد، اتّكالي على ربي أكاهو، ونولّي نكره الخطية اللي تبعّدني عليه ويبدا ربّي يخدم وينظّف قلبي وفكري ونولّي عندي حرّية انّو نقول للشهوة والخطية لا. اللّي يقبل المسيح بالحق هو شخص يعيش بعيد على الخطية ويعيش تحت الضو متع كلمة ربّي في كل حاجة في حياتو. خاطر محبّة ربي تعني طاعتو والاتكال عليه. قال السيد المسيح:

«إِنَّكُمْ إِنْ ثَبَتُّمْ فِي كلاَمِي فَبِالْحَقِيقَةِ تَكُونُونَ تلاَمِيذِي وَتَعْرِفُونَ الْحَقَّ وَالْحَقُّ يُحَرِّرُكُمْ». الانجيل: يوحنا8: 31-32

«تَعَالَوْا إِلَيَّ يَا جَمِيعَ الْمُتْعَبِينَ وَالثَّقِيلِي الأَحْمَالِ وَأَنَا أُرِيحُكُمْ. اِحْمِلُوا نِيرِي عَلَيْكُمْ وَتَعَلَّمُوا مِنِّي لأَنِّي وَدِيعٌ وَمُتَوَاضِعُ الْقَلْبِ فَتَجِدُوا رَاحَةً لِنُفُوسِكُمْ». متى11: 28-29

وقت اللّي قلوبنا خاضعة لربي في كل شيء وقتها ربي يعلّمنا كل شيء. هو يورّينا كل شيء ويرشدنا لكل شيء حتّى لشنوّة نقولو في صلاتنا. قالنّا يسوع المسيح:

«أَنَا الْكَرْمَةُ وَأَنْتُمُ الأَغْصَانُ. الَّذِي يَثْبُتُ فِيَّ وَأَنَا فِيهِ هَذَا يَأْتِي بِثَمَرٍ كَثِيرٍ لأَنَّكُمْ بِدُونِي لاَ تَقْدِرُونَ أَنْ تَفْعَلُوا شَيْئاً». الانجيل: يوحنا15: 5