-
مانيش لاهي باش نقرا كتاب الله الوقت هذا
-
عندي برشا اسئلة وحاجات نحب نعرفهم أما مش وقتو
-
منلقاش وقت باش نصلّي
-
خلّي نستنّا حتى أموري تتنظّم شويّة: نكمّل امتحاناتي وقرايتي والاّ نستقر في خدمتي والا مشاكلي تتحل ومن بعد توّا نتّلهى بالامور متع ربي بالباهي.
-
ربّي وكلمتو مش حاجة ساهلة، لازم برشا وقت وبرشا تركيز باش نقرا ونبحث. منحبّش ندخل في الامور هذي وانا مش عاطيها وقتي واهتمامي الكل. نستنا حتى يولّي عندي الوقت هذا ووقتها نجّم نبدا.
معرفة ربي كي نجيو نخمّمو فيها نحسّوها حاجة عظيمة ومهمّة ويبدا أسهل بالنسبة لينا انّو نمشيو نحلّو الفاسبوك متاعنا والا نقابلو اصحابنا في القهوة والا نقعد مع العايلة والا نقرا او نخدم…
اسأل روحك: زعما أنا قاعد نتفادى الوقت هذا باش نتعمّق في علاقتي مع ربّي خاطرني:
-
خايف من النتيجة متاعو؟ منعرفش وين باش يوصل بيّا الحال لو انا تعمّقت وبديت نقرا ونبحث ونسأل…
-
خايف انّو نفقد السيطرة على حياتي ونظامها؟
-
خايف انّي نولّي معادش نعيش الحياة اللّي انا نحبها لو بديت الحاجة هذي؟
-
منجّمش نواجه ربي خاطر حاسس بالذنب من الذنوب اللي عملتها في حياتي؟
-
خايف لو بالحق ربّي ورّاني حاجات في حياتي وقالي باش نحّيهم والا نبدّلهم….؟
كون صادق مع روحك قبل كل شيء، زعما بالحق الوقت هو أكاهو السبب اللّي ما يخلّيكش تتعمّق في أمور الدين والله؟
وقتلّي ربّي أعطى لسيّدنا موسى الوصايا العشرة كانت أوّل وأهم وصيّة هي:
“لاَ يَكُنْ لَكَ آلِهَةٌ أُخْرَى سِوَايَ” سفر الخروج 20: 3.
ولازم نعرفو انّو وقتلّي نعطيو أولويّات في حياتنا قبل ربّي وكي نتلهاو بحاجات والا بناس أكثر من اهتمامنا بأمور الله أحنا نعصيو الأمر متاعو. أحنا لاهين وعندنا مشاغل أما شنيّة أهمّية المشاغل هذيكا لو ربّي مش موجود فيها؟ وتاخذنا الدنيا وهمومها وتشتّتنا على أهم حاجة في حياتنا والمصدر الاول والوحيد لسعادتنا.
باش نعرفو في المقال الجاي كيفاش نجمو نلقاو الوقت باش نتعلّمو ونقضّيو وقت مع ربّي مهما تكون مشاغلنا.