fbpx

شمعنتها نشارك؟

كلمة نشارك منستعملوهاش برشا أما نعيشوها كل الوقت في حياتنا. المشاركة مع الاخرين حاجة مهمة في حياة الانسان. كي نفرحو نحبو نشاركو فرحتنا مع الناس اللي نحبوهم وكي نحزنو نحبو نشاركو وجيعتنا مع الناس اللّي تحس بينا.
أفكارنا، اختراعاتنا، اكتشافاتنا، الدروس اللّي نتعلموها… عندها قيمة أكبر برشا وقت اللّي نشاركو بيها مع الاخرين ووقتها نستفادو ونفيدو اكثر. أساس الحياة هو المشاركة. راجع حياتك توا تلقاها الكلها تدور على الكلمة هذي: أي حاجة مهمة في حياتك انت تحب تشاركها مع أقرب الناس ليك.

ما نتصورش فمّا موضوع أهم وأقوى من الله وعلاقتنا بيه وحياتنا معاه. هذا مركز حياتنا. وما نجموش نعيشو من غير ما نشاركو مع غيرنا المواضيع اللي تخص الله.

لازم نفهمو بالباهي انو المشاركة متعنيش انو كل واحد يحب يفرض رايو ويغير راي اللّي قدّامو وما تعنيش زادا انّي نحسب اللّي قدّامي جاهل ونبدا نعلّم فيه. المشاركة ديجا من الكلمة تعني انّو احنا مع بعضنا عندنا حاجة كيف كيف وهي انّو احنا نحبّو ربي ونحبو نعرفو عليه أكثر ونحبو نتعلمو حاجات تخلّينا نقربو منّو أكثر.

مهما تكون ديانتك، مسيحي والا مسلم مهتم انك تتعرّف على كلمة ربّي في الانجيل انت مدعو باش تشارك اللّي تعلّمتو مع الناس اللّي دايرة بيك. علاش؟ على خاطر انت عرفت وهوما زادا من حقهم يعرفو. وعلى خاطرك تحبهم، تلقى روحك تحب تشارك اللّي عرفتو على ربّي. وقتلّي تحكي على ربي هذا ميعنيش اللّي احنا نحكيو على ديانات معينة اما على علاقة معاه واكتشاف ليه ولمحبتو ليك. هذاكا علاش المشاركة تبدا مليانة محبة واحترام وتقدير للاخر ومفيهاش تعصّب.

مش لازم تبدا عندك معرفة كبيرة باش تشارك مع الاخر. بالعكس الحاجة الصغيرة اللي تعلّمتها على ربي وعلاقتو بالانسان تنجّم تتشارك بيها مع الناس اللي قريبتلك، عايلتك والا صحابك. ومنها تنجم تستخرج دروس عظيمة تغيّرلك حياتك وتخلّيك انسان جديد.

اكتشاف الله ومعرفتو رحلة مزيانة برشا ومليانة بركات وتغيير في ذواتنا. نشجعك كمّل بحثك أما مش وحدك. شارك ناس تعرفهم وتثق فيهم، صحابك، عايلتك والا جيرانك.

لو عندك سؤال او استفسار اكتبلنا في الفاسبوك وفما شكون يتواصل معاك