وين نلقى الكنيسة؟
سؤال باهي برشا اما مش بسيط على خاطر فما أكثر من اجابة للسؤال هذا.
وقت تسأل وتقول وين الجامع؟ والا وين الهيكل؟ ظاهر انك تحكي على بنية معينة موجودة لهدف ديني
بالنسبة لسؤال “وين نلقى الكنيسة” هذا يعني اكثر من حاجة
- البلاصة اللّي فيها المسيحيين يقومو بالعبادة
- الحدث والا الاجتماع اللّي فيه المسيحيين يتلمّو باش يعبدو الله
- وزادا تنجّم تكون مجموعة المؤمنين الملتزمين انهم يتبعو ويطيعو الانجيل ويعيشو بحسب وصايا السيد المسيح
متعودين في بلادنا اللي وقت نبداو ماشين نحوسو في وسط البلاد ونشوفو بنية كبيرة عليها صليب نقولو هذي هي الكنيسة. ساعات برشا زادا ناس تحب تمشي تشوف والا تعرف اكثر على المسيحية، أول حاجة يخمّمو فيها انهم يمشيو للكاتدرال اللي في برشا بلايص في تونس ويحاولو يدخلو باش يشوفوها كيفاش من داخل.
أما المسيحية ماهيش في البلايص والكنيسة أعمق برشا من حيوط ومباني.
في السلسلة هذي متع الكنيسة باش نشوفو بطريقة أعمق المواضيع المتعلقة بالكنيسة وانا متأكد انو باش تكتشف حاجات جديدة مكنتش تعرفها على موضوع الكنيسة.
وين الكنيسة؟
وين يتلمّو المسيحيين باش يعبدو الله ويجتمعو باش يصلّيو؟
في الكتاب المقدّس كانو المسيحيّين الأوائل يجتمعو في أكثر الاوقات في الديار. خلّينا نشوفو أمثلة من الانجيل
وَلَمَّا جَاءَ الْيَوْمُ الْخَمْسُونَ، كَانَ الإِخْوَةُ مُجْتَمِعِينَ مَعاً فِي مَكَانٍ وَاحِدٍ، 2وَفَجْأَةً حَدَثَ صَوْتٌ مِنَ السَّمَاءِ كَأَنَّهُ دَوِيُّ رِيحٍ عَاصِفَةٍ، فَمَلأَ الْبَيْتَ الَّذِي كَانُوا جَالِسِينَ فِيهِ. أعمال الرسل2: 1-2
حَيْثُ كَانَ عَدَدٌ كَبِيرٌ مِنَ الْمُؤْمِنِينَ مُجْتَمِعِينَ يُصَلُّونَ. أعمال الرسل12: 12
وَعَلَى الْكَنِيسَةِ الَّتِي تَجْتَمِعُ فِي بَيْتِهِ. الرسالة الى اهل كولوسي4: 15
كي نشوفو في الايات هوني وبرشا ايات اخرى اللي كلمة “كنيسة” تحكي على البلاصة اللي فيها يتلمّو المسيحيين مع بعضهم وفي اكثر الاحيان تكون في دار واحد منهم.
اكتشف في المقال هذا شنوّة نعملو في الكنيسة؟
لو عندك سؤال او استفسار اكتبلنا في الفاسبوك وفما شكون يتواصل معاك