fbpx

الوحي في الانجيل

ربي خلق الانسان باش نعيشو معاه في علاقة محبة واتكال وتواصل معاه. الله عندو برشا طرق أعلن فيها على روحو وورّا للانسان انّو موجود ويهتم بكل تفاصيل حياتو. وقت نشوفو الطبيعة والتاريخ والضمير البشري نجمو نلقاو إعلانات الله في كل جزء فيها.

اَلسَّمَاوَاتُ تُحَدِّثُ بِمَجْدِ ٱللهِ، وَٱلْفَلَكُ يُخْبِرُ بِعَمَلِ يَدَيْهِ….. وَصَايَا ٱلرَّبِّ مُسْتَقِيمَةٌ تُفَرِّحُ ٱلْقَلْبَ. أَمْرُ ٱلرَّبِّ طَاهِرٌ يُنِيرُ ٱلْعَيْنَيْنِ. خَوْفُ ٱلرَّبِّ نَقِيٌّ ثَابِتٌ إِلَى ٱلْأَبَدِ. أَحْكَامُ ٱلرَّبِّ حَقٌّ عَادِلَةٌ كُلُّهَا. أَشْهَى مِنَ ٱلذَّهَبِ وَٱلْإِبْرِيزِ ٱلْكَثِيرِ، وَأَحْلَى مِنَ ٱلْعَسَلِ وَقَطْرِ ٱلشِّهَادِ. (سفر المزامير لسيدنا داود 19)

زادا ربي كلّمنا عن طريق الانبياء والرسل باش نفهمو رسالتو وقصدو لحياتنا. والكلام هذا تسجّل في كتاب الله المقدس.

الكتاب المقدّس هو إعلان الله المكتوب وهو أساس إيماننا ليه قوّة تأثير وسلطان كبير على حياة كلّ شخص يقراه ويطيعو.

أما محتاجين نفهمو موضوع ديما يصير فيه التباس وعدم فهم وهو موضوع الوحي. برشا يفكرو انّو ربي أملى على سيدنا جبريل الملاك كلامو اللّي هو بيدو يهبط ويمليه على النبي كلمة كلمة والنبي يدونو على ورق كيما سمعو بالضبط. وفي الواقع ماهوش هذا الوحي الالهي.

شمعنتها الوحي؟

في الكتاب المقدّس مكتوب:

كُلُّ ٱلْكِتَابِ هُوَ مُوحًى بِهِ مِنَ ٱللهِ، وَنَافِعٌ لِلتَّعْلِيمِ وَٱلتَّوْبِيخِ، لِلتَّقْوِيمِ وَٱلتَّأْدِيبِ ٱلَّذِي فِي ٱلْبِرِّ (2 تيموثاوس 3 : 16)

كلمة موحى به من الله هي ترجمة للغة اليونانية اللي تكتب بيها الانجيل θεόπνευστος وتعتي بالضبط أنفاس الله أو نسمة الله.
وقت ربّي خلق سيدنا ادم مكتوب في التوراة في سفر التكوين:

وَنَفَخَ فِي أَنْفِهِ نَسَمَةَ حَيَاةٍ. فَصَارَ آدَمُ نَفْسًا حَيَّةً (سفر التكوين 2 : 7)

وكيما نسمة الله اللي خلقت ادم هي اللي عطات حياة لللانسان الاول زادا كلمة الله هي كلمة حيّة وتحيي نفوسنا. قال السيد المسيح:

اَلْكلاَمُ الَّذِي أُكَلِّمُكُمْ بِهِ هُوَ رُوحٌ وَحَيَاةٌ (الانجيل: يوحنا 6 : 63)

الوحي في المسيحية

في الانجيل وفي التوراة زادا نحنا ما نؤمنوش بالوحي الإملائي كيما قلنا الفوق. وفي الواقع أي واحد يفترض الطريقة هذي من الوحي لازم يلقى حل واجابات على المشاكل هذوما

  1. لغة الوحي: وقتلّي نقولو ربي أملا كلام حرف حرف لشخص معيّن. هذا يعني انّو هو استخدم لغة معينة على أساس انّو هو لغتو هو الخاصة. وهذا ماهوش منطقي على خاطر أول حاجة اللغة هذي محدودة وتخلقت من الانسان في وقت معيّن مهما تكون قديمة وسامية. وثاني حاجة اللغات هي صناعة بشرية باش ينجمو يتواصل مع بعضهم ويفهمو حاجات بحواسهم البشرية. هذي وسيلة الانسان المحدودة باش ينجم يتواصل ويفهم. ربّي ينجم يستخدم اللغات هذي باش يفهمنا ويقربلنا رسالتو بطريقة أوضح أما ميجيش انّو تكون واحدة من اللغات هذوما هي اللغة متاعو الخاصة والمقدسة. ربي هو إله البشر الكل من كل اللغات وكلمتو لازم تكون مفهومة للجميع

  2. دور النبي يولّي يقتصر في انّو يكتب اللي يسمع ويتملا عليه يعني هو فقط ناسخ وكاتب. كيما القلم والا clavier يكتب من غير فهم ولا تدخّل. النبي ماهوش ناسخ او كاتب، النبي هو يستقبل من ربّي رسالتو ووحيو. مالا النبي عندو دور في الاستقبال وفي توصيل الرسالة هذي للشعب بلغتو الخاصة وبكلامو وبأسلوبو وبطريقتو في التعبير.

  3. الاملاء والنسخ الحرفي يخلّي فمّا امكانية كبيرة برشا للنسيان والغلط. ووقتها باش يتحسب كل غلطة في النسخ وكاينّو موجّه لربي.

المسيحي يؤمن اللّي ربي استخدم لغة البشر باش تكون وسيلة يكلمّنا بيها. ربّي كلّم النبي وكاتب الوحي وقادو بروحو انّو يدوّن الوحي ويقولو بأسلوبو وبلغتو الخاصة كيما قال سيدنا داود:

تَكَلَّمَ رُوحُ الرَّبِّ بِفَمِي، وَكَلِمَتُهُ نَطَقَ بِهَا لِسَانِي (سفر صموئيل الثاني 23 : 2)

الكتاب المقدس ماهوش مكتوب برغبة الانسان:

إِذْ لَمْ تَأْتِ نُبُوءَةٌ قَطُّ بِإِرَادَةٍ بَشَرِيَّةٍ، بَلْ تَكَلَّمَ بِالنُّبُوآتِ جَمِيعاً رِجَالُ اللهِ [الْقِدِّيسُونَ] مَدْفُوعِينَ بِوَحْيِ الرُّوحِ الْقُدُسِ. (الانجيل: رسالة بطرس الثانية 1 : 21)

الله هو اللّي أوحى بالكتاب المقدّس وحي كامل ومطلق أما زادا ربّي سمح انّو تتسجّل حاجات في الكتاب المقدّس ماهيش كلام الله او الحاجة اللّي يحبنا نطيعوها كيما كلام الشيطان اللي قالو لحواء في سفر التكوين. كلام الشيطان ماهوش الحق أما ربّي أمر انّو الكتاب هذا يتسجّل باش نفهمو خطة ابليس وسبب الخطية وغلطة ادم وحواء.

تسجلت زادا برشا غلاط وذنوب لشعب الله من غير استثناء باش نتعلمو دروس من حياتهم واغلاطهم ونفهمو انّو مفمّاش حتى حد معصوم من الغلط والكلنا محتاجين الله انو يطهرنا وينقّينا وتكون الحكايات هذوما عبرة لينا ونعرفو مشيئة ربي لينا.

اليوم فرصة ليك انك تكتشف وتقرا الانجيل وتشارك الناس الدايرة بيك بحكمة ربي وكلمتو الحق. اتصل بينا في الخاص والا في صفحة الفاسبوك هوني واحنا نوفرولك الانجيل مجانا وين انت.

لو عندك سؤال او استفسار اكتبلنا في الفاسبوك وفما شكون يتواصل معاك