fbpx

الله متواضع

1هَلِّلُويَا. سَبِّحُوا يَاعَبِيدَ الرَّبِّ، سَبِّحَوا اسْمَ الرَّبِّ. 2لِيَكُنِ اسْمُ الرَّبِّ مُبَارَكاً مِنَ الآنَ وَإِلَى الأَبَدِ. 3لِيُسَبَّحْ بِاسْمِ الرَّبِّ مِنْ مَشْرِقِ الشَّمْسِ إِلَى مَغْرِبِهَا. 4الرَّبُّ مُتَسَامٍ عَلَى جَمِيعِ الأُمَمِ، وَمَجْدُهُ فَوْقَ السَّمَاوَاتِ. 5مَنْ هُوَ نَظِيرُ الرَّبِّ إِلَهِنَا السَّاكِنِ فِي الأَعَالِي؟ 6الْمُطِلِّ مِنْ عَلْيَائِهِ إِلَى أَسْفَلَ لِيَرَى السَّمَاوَاتِ وَالأَرْضَ. 7يُنْهِضُ الْمِسْكِينَ مِنَ التُّرَابِ، وَيَرْفَعُ الْبَائِسَ مِنْ الْمَزْبَلَةِ، 8لِيُجْلِسَهُ مَعَ أَشْرَافِ شَعْبِهِ. 9يَرْزُقُ العَاقِرَ أَوْلاَداً. يَجْعَلُهَا أُمّاً سَعِيدَةً. هَلِّلُويَا. مزمور 113

الله خالق الكل، كلّي المعرفة والحكمة. هو القادر بكلمة منّو انو يفنى الجميع ويخلق كائنات جديدة واراضي جديدة. هو الله اللي مجدو فوق كل شيء وهو العالي المتسامي على كل مخلوقاتو. أكيد مافما حتى واحد يختلف على قدرة الله الكاملة وقوتو ومجدو…

الله مش محتاج لحتى شيء. مش محتاج للانسان ولا لاي مخلوق. هو كامل أما هو قرّر انو يخلق عالم كامل يعيش فيه الانسان. خلق الانسان كائن عندو ارادة وحرية وهو اللي يقرّر خضوعو وعبادتو لله والا لا. ربي كان ينجم يفرض على الجميع انهم يعبدوه وميعطيهم حتى سبيل انو يعصيوه أما هو خلقهم أحرار انهم يختاروه ويعبدوه بكامل ارداتهم. ملايين رفضتو وترفض انها اتبعو اما هو قرّر انو يعطيهم القدرة باش يحبّوه ويتبعوه.

الله الخالق العظيم قرّر انو يتلهى بكل تفاصيل الانسان مهما تكون صغيرة وتافهة ويعبّر على محبتو ليه رغم انو مش محتاج انو يعمل هكا. وهذا هو التواضع.

وقت اللّي الأب يحب يعلّم ولدو درس مهم ويحب الكلام يوصلو بالساهل والواضح، شنوة يعمل؟ ياقف وقفة تخوّف ويبدا يتكلم بلغتو الصعيبة اللي الطفل ميفهمهاش والا يتحنا ويهبط في مستوى ولدو ويتكلم معاه بوداعة وطريقة بسيطة؟ أكيد انت تعرف شنوة يعمل الاب الحكيم المتواضع…

والهنا المحب هو متواضع وهو معلّمنا في التواضع على خاطرو قرّر انو يهبط لمستوانا باش يوصلنا رسالتو بابسط طريقة نفهموها. التواضع ما عمرو ما كان استنقاص اما هو عكس التكبر والعجرفة وهي ما تلغيش عظمتو وقدرتو. قال سيدنا أيوب على ربي:

“4هُوَ حَكِيمُ الْقَلْبِ وَعَظِيمُ الْقُوَّةِ، فَمَنْ تَصَلَّبَ أَمَامَهُ وَسَلِمَ؟ 5هُوَ الَّذِي يُزَحْزِحُ الْجِبَالَ، فَلاَ تَدْرِي حِينَ يَقْلِبُهَا فِي غَضَبِهِ. 6هُوَ الَّذِي يُزَعْزِعُ الأَرْضَ مِنْ مُسْتَقَرِّهَا فَتَتَزَلْزَلُ أَعْمِدَتُهَا. 7هُوَ الَّذِي يُصْدِرُ أَمْرَهُ إِلَى الشَّمْسِ فَلاَ تُشْرِقُ، وَيَخْتِمُ عَلَى النُّجُومِ. 8يَبْسُطُ وَحْدَهُ السَّمَاوَاتِ، وَيَمْشِي عَلَى أَعَالِي الْبَحْرِ. 9هُوَ الَّذِي صَنَعَ النَّعْشَ وَالْجَبَّارَ وَالثُّرَيَّا وَمَخَادِعَ الْجَنُوبِ، 10صَانِعُ عَظَائِمَ لاَ تُسْتَقْصَى وَعَجَائِبَ لاَ تُحْصَى.” ايوب 9: 4-10

الله ماهوش متكبر، الله متواضع وهذي قمة القوة والعظمة. تنازل باش يتعامل مع الانسان الناقص ويحميه ويرعاه كل يوم. شكون فينا ينجم يعرف ويعيش ويستمتع بالطريق مع الله لو مكانش ربي متواضع ومستعد باش يتنازل ويتعامل معانا كيما الاب الراعي الوديع المحب.

الله على خاطرو متواضع سمّى ابراهيم “خليل الله” ومعنتها صديقو وشاركو الحاجات اللي باش يعملهم مع شعوب اخرى وقال في التوراة : “هل أُخفي عن إبراهيم ما أنا فاعله؟” مكتوب زدا في الكتاب المقدس:

“السَّيِّدَ الرَّبَّ لَا يَصْنَعُ أَمْراً إِلَّا وَهُوَ يُعْلِنُ سِرَّهُ لِعَبِيدِهِ الْأَنْبِيَاءِ” عاموس 3:7.

ربي يكشف مشيئتو واللي باش يعملو مش على خاطرو محتاج اما على خاطرو يحب. وهذا هو التواضع.

الله على خاطرو متواضع سمّى موسى “كليم الله” وكان موسى من اكثر الانبياء اللي ربي كلمهم ووراهم شريعتو وقوانينو بالتفصيل. ربي استخدم سيدنا موسى وانبياء اخرين قناة انهم يوصلو كلمتو.

الله على خاطرو متواضع حب يكلّم الانسان ويورّيه مشيئتو وقصدو لحياتو. كلمو بطريقة بسيطة ومتسلسلة عن طريق الانبياء اللي بعثهم للانسان وحفظ كلمتو الحية من الاف السنين وخلانا في الكتاب المقدس بلغة بسيطة مفهومة اما عميقة وتحيي الروح والنفس

الله على خاطرو متواضع قرّر انو ينقذ الانسان من حكم الموت وينزل هو بارادتو باش ينجّيه ويورّيه الطريق عن طريق المسيح يسوع. هذي قمّة التواضع وفي الانجيل مكتوب:

“وَبِاعْتِرَافِ الْجَمِيعِ، إِنَّ سِرَّ التَّقْوَى عَظِيمٌ: اللهُ ظَهَرَ فِي الْجَسَدِ، شَهِدَ الرُّوحُ لِبِرِّهِ، شَاهَدَتْهُ الْمَلاَئِكَةُ، بُشِّرَ بِهِ بَيْنَ الأُمَمِ، أُومِنَ بِهِ فِي الْعَالَمِ، ثُمَّ رُفِعَ فِي الْمَجْدِ.” 1 تيموثاوس 3 : 16- 17

الله يجي في صورة انسان؟ مش قابلها مخك مش هكا؟ تقول الله اعظم من انو يجي في صورة انسان وانا نقولك صحيح انا زادا نقول الله اعظم وامجد برشا أما هو قرّر يعمل هذا علاش؟ على خاطرو يحبنا وعلى خاطرو متواضع وعلى خاطر هذا ما ينقصش من قيمتو بالعكس يخلّينا ننحنيو امامو ونشكروه على محبتو العظيمة وقدرتو اللي تفوق عقولنا وتفكيرنا.

كان فمّا ملك من اعظم الملوك واقواهم في العالم الكل. كان الملك هذاكا يتمشى في المملكة متاعو وسمع صوت من البحر متع طفل قاعد يعيّط ويغرق. الملك عرف انو هذاكا ولدو اللي قاعد يغرق. ما فكّرش وقتها انو يستنا الجنود والحاشية متاعو يهبطو يجيبو ولدو من الماء ولا خمّم في حوايجو المرصعة بالذهب واللولو انو باش يبلهم ويفسّدهم ولا قعد يفكر انو هذا باش ينقصلو من قيمتو كملك لو هو هبط في الماء. هو خمم في حاجة واحدة انو ولدو الغالي على قلبو قاعد يغرق وهبط في الماء وهزو ونقذو من الموت….

الله ملك الملوك ورب الارباب قرّر انو يهبط ويتنازل ويجي على الارض وينقذك وينقذني من حكم موت وبعد عليه. حاولنا ننقذو رواحنا ونوصلو لربي بكل الطرق اما منجمناش خاطر ديما اغلاطنا تبعدنا وتخلينا نبعدو اكثر و”اجرة الخطية موت” اما على خاطر ربي متواضع ورحيم ومحب قرّر هو اللي بيديه ينقذنا وينجّينا.

ايه صحيح حاجة تفوق عقولنا على خاطر عقولنا محدودة. وحاجة تنخز قلوبنا على خاطر قلوبنا مليانة ذنوب وخطايا اما وقت اللي نقبلو العطية المجانية هذي من عند ربي اذهاننا تتجدّد وقلوبنا تتطهّر ونتملاو بالمحبة الفياضة من عند الهنا العظيم.

يا رب نحب نشكرك على خاطرك اخترت انك تكون متواضع وحبيتنا رغم كل اثامنا وجيت ونجيّتنا من حكم الموت واعطيتنا الفرصة انو نعيشو ونستمتعو بالحرية معاك. يا رب علّمنا انو احنا نكونو متواضعين ونقبلو الحق متاعك من غير تكبّر وتعالي على خاطرك قلت في كلمتك

«إِنَّ اللهَ يُقَاوِمُ الْمُتَكَبِّرِينَ، وَلَكِنَّهُ يُعْطِي الْمُتَوَاضِعِينَ نِعْمَةً». يعقوب 4: 6

لو عندك سؤال او استفسار اكتبلنا في الفاسبوك وفما شكون يتواصل معاك