كل انسان في الدنيا هذي يحب يكون عندو مستقبل خير ليه ولعايلتو. يحب انو تتحقق امالو وامنياتو واحلامو. هذي حاجة اساسية في حياتنا لدرجة انّو ساعات نبداو نلوجو على مستقبلنا في صفحات حظك اليوم وشنوة مخبيلنا العام الجديد. نعملو ساعات على الابراج والا كلام ناس باش نعرفو شنوة باش يصيرلنا لينا ولعايلتنا.
كلنا عندنا أمل في عام جديد. سنة جديدة مليانة فرحة وسعادة اما لازم نرجعو للمصدر متع الامل الحقيقي. يكفينا اعتماد على مصادر مزيفة ممكن تعطينا امال أما تقعد ديما واهية وماليها حتى تأكيد. المصدر الحقيقي للامل والرجاء الاكيد مينجم يجي كان من رئيس الحياة فادينا يسوع المسيح.
الكتاب المقدّس تكلّم بطريقة مميزة على المسيح وقال عليه انّو هو وحدو مرساة نجاتنا وسط أمواج الدنيا هذي.
“هَذَا الرَّجَاءُ هُوَ لَنَا بِمَثَابَةِ مِرْسَاةٍ أَمِينَةٍ ثَابِتَةٍ تَشُدُّ نُفُوسَنَا إِلَى مَا وَرَاءَ الْحِجَابِ السَّمَاوِيِّ” عبرانيين 6: 19
شنوة تستنا من العام الجديد؟ شنية تنجم تكون امال واحد ضايع معندوش رجاء وتايه معندوش نور يورّيه الثنية؟ احنا نعيشو في عالم صعيب مليان ذنوب وظلم بعيد على ربي ونبداو نلوجو على الامل في البلايص الغالطة.
“قَدْ نَعِيشُ سَبْعِينَ سَنَةً، وَإِنْ كُنَّا ذَوِي عَافِيَةٍ فَثَمَانينَ وَأَفْضَلُ أَيَّامِنَا تَعَبٌ وَبَلِيَّةٌ، لأَنَّهَا سَرْعَانَ مَا تَزُولُ فَنَطِيرُ” مزمور 90: 10
دعوة لكل واحد اليوم واحنا نستقبلو في عام جديد دعوة لكل واحد متخبّط في غربة العالم، حزين من غير أمل، انو يجي للمسيح اللّي فيه كل شي ومن غيرو مفمّا حتى شي. ايجا ليسوع وهو يعطيك امال ورجاء اكيد في حياة خير وعام جديد بقلب جديد وايمان أقوى ومحبة أعمق وثقة أثبت.
مع المسيح عام جديد برجاء أكيد.
لو عندك سؤال او استفسار اكتبلنا في الفاسبوك وفما شكون يتواصل معاك