شارك_ الميلاد

قصص وحكايات من فترة ميلاد المسيح اقراها معانا وتأمل فيها واستخرج منها الدروس العميقة وما تنساش تشارك الفرحة والميلاد

في قصة ميلاد السيد المسيح كانو الملايكة حاضرين برشا. ربي أرسل الملايكة من السماء باش يوصلو اخبار سماوية. أحنا منعرفوش كيفاش هوما الملايكة، عندهم جوانح والا يلبسو الابيض والا كيفاش يتحركو في الارض… أما اللي نعرفوه اللّي هوما كان ليهم دور كبير انو يوصلو لبرشا عباد رسايل مهمة من الله على الميلاد وقصد ربي من الحدث هذا.

ظهرو الملايكة اربع مرات في قصة لميلاد وفي كل مرة وكانت ديما رسالتهم هي “لا تخافو!”. نفس الكلمة تقالت لزكريا و السيدة مريم ومن بعد يوسف وفي الاخر الرعاة.

“لا تخافوا!” هذه هي رسالة الله من وقت الميلاد لتوّا. الخبر هذا يورّينا انو ميلاد السيد المسيح والخوف ما يتقابلوش. حضور المسيح ينحّي كل خوف.

جا الوقت باش تطرد كل خوفك وانت في حضرة الله.

نصلّي انو في فترة الميلاد هذي وكل يوم في العام الجديد تفهم انو وقت يسوع يتولد في قلبك معادش فمّا خوف أو قلق. رسالة الميلاد ما تبدلتش من الفين سنة وكلمات الملايكة مازالت ترن في عالمنا: “ما تخافوش”.

وقت ظروفك تتهز تذكّر “لا تخافو!”

وقت اللي عندك مشاكل مادية تذكّر “لا تخافو!”

وقت تكون محبط تذكّر “لا تخافو!”

ربي وعد انو يمنحنا السلام الكامل. السلام ماهوش غياب المشاكل أما هو وجود الله. وفي فترة الميلاد هذي تنجم ترتاح في سلامو الفائق والمشبع.

لو عندك سؤال او استفسار اكتبلنا في الفاسبوك وفما شكون يتواصل معاك