fbpx

الحب أنواع

المحبة أنواع، مالا وقت الانجيل يقول الله محبة.. شنية نوعها هالمحبة؟

احنا ياسر نستخدمو كلمة نحب وفي برشا بلايص وبرشا مواضيع. نقولو: نحب الكسكسي اللّي تطيبو أمي، نحب جدي، نحب قطوستي، نحب ولدي، نحب مرتي، نحب خدمتي، نحب المسلسل الفلاني، نحب القهوة العربي…. في اللغة العربية والعامية كلمة حب تمشي مع برشا معاني.

اما بالطبيعة ميعنيش انو نحبو الحاجات هذوما والعباد بنفس الطريقة والدرجة. اكيد حبي لولدي اقوى واكبر بمراحل من حبي للقهوة. انا نعطي حياتي الكل على خاطر ولدي اما ما نعطيش اكثر من خمسة دينار اذا شاطت باش ناخو قهوة.

اللغة الاصلية متاع الانجيل هي اليونانية ومن بعد اترجم لبرشا لغات ولهجات باش الناس الكل في كل بلاصة ومن كل لغة يفهمو كلمة الله. اللغة اليونانية ياسر عميقة وساعات فيها كلمات مفماش منها باللغات الحالية. كيما الحب، باليوناني فما برشا كلمات تعبر على الحب اما اترجمت لنفس الكلمة على خاطر مفماش مرادف ليها في لغتنا.

حب الايروس: eros

ويتسمى زادا الحب الطفولي والا الحب الاناني الشهواني. الحب هذا فيه برشا مصالح ويخلي الشخص يغزر للطرف الاخر على اساس انو للمتعة والمصلحة. تركيز الحب هذا هو على الانا واشباع الشهوات.

حب ستورج “storge

هذا الحب اللي مربوط بالعايلة. هو حب طبيعي يتزرع فينا من ولادتنا وساعات تصير حاجات تخلي الحب هذا يتشوه.

حب الفيلو “philo

هذا الحب اللي نحسوه في مجالات حياتنا مع صحابنا والناس القريبة لينا برشا. الحب هذا فيه برشا مشاعر قوية وحلوة. الحب هذا نحسوه لناس قريبة لينا يعني ماهوش للناس الكل ولا نجم نعطيه للناس اللي منهضمهاش والا معنديش حتى علاقة بيهم. المحبة هذي فيها شروط. صحيح عندنا ناس قريبتلنا نحبوهم برشا اما ديما توقعاتنا انو هوما زادا يبادلونا الحب هذا وانهم يشبعو الاحتياج اللي احنا نعيشوه. محبتنا هذي مهما تكون قوية اما مربوطة بردة فعل الاخر وشنوة يعطيني في المقابل من مشاعر واهتمام.

حب الاغابي AGAPE

هذا اقوى وارقى حب. ماهوش مشاعر اكاهو اما هو قرار ووعي كامل. الحب هذا يعطي وميستناش باش ياخو. ديما يلوج على الباهي للاخر مهما تكون حالتو ومهما يكون رد فعلو. الاغابي هو حب من غير شروط ولا انتظارات. حب ماهوش اناني. هذا هو الحب اللي ربي توصف بيه في الانجيل “الله محبة” “الله اغابي” محبة كاملة بدون شروط.

مالا وقت نقول ربي يحبني بحسب الانجيل هذا يعني انو حتى كي انا منيش باهي ونغلط ونعمل حاجة خايبة ربي يقعد يحبني. ربي يحبني ديما وكي نطيح في الغلط ما يوقفش حبو اما يخلي حبو يطهرني ويوقفني على ساقيا باش نكمل ونبعد على الغلط. هو يحبنا مش على خاطر احنا نستحقو الحب هذا والا على خاطرنا عملنا اعمال باهية خلاتو يرضى علينا. هو يحبنا على خاطر هو محبة. حبو مش ضعيف مربوط بينا ومشاعرنا اما حبو قوي لا يتزعزع ولا ينقص ولا يتهز.

خلينا نشوف بعض الايات في الانجيل باش نفهمو المعنى العميق لكلمة اغابي

اللهُ الّذي هو غَنيٌّ في الرَّحمَةِ، مِنْ أجلِ مَحَبَّتِهِ الكَثيرَةِ (اغابي) الّتي أحَبَّنا بها، 5 ونَحنُ أمواتٌ بالخطايا أحيانا مع المَسيحِ -بِالنِّعمَةِ أنتُمْ مُخَلَّصونَ- افسس2 : 4-5

وَلَكِنَّ اللهَ أَثْبَتَ لَنَا مَحَبَّتَهُ، إِذْ وَنَحْنُ مَازِلْنَا خَاطِئِينَ مَاتَ الْمَسِيحُ عِوَضاً عَنَّا. رومية 5: 8

تنزيل تطبيق قراءة الانجيل

شفت الحب العظيم اللي ربي يعطيهولنا لدرجة انو سمّانا اولاد ليه؟

شنوة يصير في حياتنا وقتلّي نستقبلو الحب هذا؟

الاغابي، حب ربي العظيم اللي من غير شروط، يملا قلوبنا وحياتنا الكل ويفيض فينا ووقتها الحب هذا يخرج منا للناس اللي دايرة بينا. نولّيو نشوفو العباد كيما هو يشوفهم ونحبوهم كيما هو يحبهم. الحب العادي الطبيعي ميخلينيش نجم نحب عدوي ولا نغفر ونسامح اللي ضرني ووجعني خاصة كي تبدا الوجيعة كبيرة. اما وقت تفيض محبة ربي فيا نولي نحب الناس الكل بدون شروط مهما يكون اللي عملوه ويعملوه.

السيد المسيح علّم وقال:

وَسَمِعْتُمْ أَنَّهُ قِيلَ: تُحِبُّ قَرِيبَكَ وَتُبْغِضُ عَدُوَّكَ. 44 أَمَّا أَنَا فَأَقُولُ لَكُمْ: أَحِبُّوا أَعْدَاءَكُمْ، وَبَارِكُوا لاَعِنِيكُمْ، وَأَحْسِنُوا مُعَامَلَةَ الَّذِينَ يُبْغِضُونَكُمْ، وَصَلُّوا لأَجْلِ الَّذِينَ يُسِيئُونَ إِلَيْكُمْ وَيَضْطَهِدُونَكُمْ، 45 فَتَكُونُوا أَبْنَاءَ أَبِيكُمُ الَّذِي فِي السَّمَاوَاتِ: فَإِنَّهُ يُشْرِقُ بِشَمْسِهِ عَلَى الأَشْرَارِ وَالصَّالِحِينَ، وَيُمْطِرُ عَلَى الأَبْرَارِ وَغَيْرِ الأَبْرَارِ. 46 فَإِنْ أَحْبَبْتُمُ الَّذِينَ يُحِبُّونَكُمْ، فَأَيَّةُ مُكَافَأَةٍ لَكُمْ؟ أَمَا يَفْعَلُ ذَلِكَ حَتَّى جُبَاةُ الضَّرَائِبِ؟ 47 وَإِنْ رَحَّبْتُمْ بِإِخْوَانِكُمْ فَقَطْ، فَأَيَّ شَيْءٍ فَائِقٍ لِلْعَادَةِ تَفْعَلُونَ؟ أَمَا يَفْعَلُ ذَلِكَ حَتَّى الْوَثَنِيُّونَ؟ 48 فَكُونُوا أَنْتُمْ كَامِلِينَ، كَمَا أَنَّ أَبَاكُمُ السَّمَاوِيَّ هُوَ كَامِلٌ! الانجيل: متى 5: 43-47

وقت اللي تقرا التعليم هذا تقول هذا مستحيل، شكون ينجم يعيش ويعمل هكا. اما وقت تستقبل محبة ربي وتفيض فيك وقتها تولي عندك القدرة والقوة انك تعيش وتمارس الحب هذا.

تحب تعرف وتكتشف انت واصحابك اكثر على الله على المحبة، الاغابي اقرا الانجيل. تنجم تتصل بينا ونبعثولك الانجيل.

الْمَحَبَّةُ تَصْبِرُ طَوِيلاً؛ وَهِيَ لَطِيفَةٌ. الْمَحَبَّةُ لاَ تَحْسُدُ. الْمَحَبَّةُ لاَ تَتَفَاخَرُ وَلاَ تَتَكَبَّرُ. 5 لاَ تَتَصَرَّفُ بِغَيْرِ لِيَاقَةٍ، وَلاَ تَسْعَى إِلَى مَصْلَحَتِهَا الْخَاصَّةِ. لاَ تُسْتَفَزُّ سَرِيعاً، وَلاَ تَنْسُبُ الشَّرَّ لأَحَدٍ. 6 لاَ تَفْرَحُ بِالظُّلْمِ، بَلْ تَفْرَحُ بِالْحَقِّ. 7إِنَّهَا تَسْتُرُ كُلَّ شَيْءٍ، وَتُصَدِّقُ كُلَّ شَيْءٍ، وَتَرْجُو كُلَّ شَيْءٍ، وَتَتَحَمَّلُ كُلَّ شَيْءٍ. 8 الْمَحَبَّةُ لاَ تَزُولُ أَبَداً. كورنثوس الاولى 13: 4-8