زعما لوقتاش باش تقعد تلوج على راحة الضمير من غير أمل في غدوة وكل ما تشد حاجة تلقاها حتى شي؟ زعما لوقتاش باش تقعد تخدّر في ضميرك بفسلسفات الدنيا اللي تخليك تعمل في حاجات انت متحبهاش وبالسيف عليك؟
زعما لوقتاش باش تقعد تاعب وغدوة تموت وتلحق باللّي سبقوك؟ لوقتاش باش تقعد ماشي في الطريق وتستخايل في روحك حر أما انت في الحقيقة عبد لشهواتك والمعاصي اللي تعمل فيها؟ لوقتاش تعيش في قلق وحيرة في هالعالم الشرير والظالم المليان حروب وعرك والشيطان يقود فيه للقتل والدم والنجاسة؟ لوقتاش؟
زعما لوقتاش يا انسان باش تقعد تلوج على السعادة وانت تدور في الفارغ من غير ما تلقى شيء؟ زعما لوقتاش يا انسان باش تبقى غارق في تيارات متع عالم مظلم ميعرفش الرحمة ولا المحبة على خاطرو بعيد من الله اللي هو مصدر المحبة؟
لو كنت صادق مع روحك، متسمعش كلام العباد وتمشي بيه واسمع كلام قلبك من داخل خاطر النور فيك حتى لو متخبي. اسمع لكلمة ربي الحية واللي تحيي القلوب.
نحب نقولك اللي الفلسفة ماعمرها ماهي باش تريّحك ولا تعطيك السعادة والسلام.. حتى أعمالك الباهية والصالحة ماهيش هي اللّي باش تنجّيك. الكتاب المقدس يقول:
“فَإِنَّكُمْ بِالنِّعْمَةِ مُخَلَّصُونَ، بِالإِيمَانِ، وَهَذَا لَيْسَ مِنْكُمْ. إِنَّهُ هِبَةٌ مِنَ اللهِ. لاَ عَلَى أَسَاسِ الأَعْمَالِ، حَتَّى لاَ يَفْتَخِرَ أَحَدٌ“ أفسس 2: 8, 9.
تحب تعرف لوقتاش؟ توّا هو الوقت المناسب باش حياتك تتغيّر.
على خاطر فمّا حاجة كبيرة ومزيانة تعملت على خاطرك انت ويسوع المسيح دفع كل حاجة باش انت تكون ليك حياة جديدة مع ربي. اللي عليك هو انك تجي ليسوع وتسلمو قلبك وكيانك وهو باش يعطيك خلاصو وبركاتو.
ما تأجّلش وما تقسّيش قلبك:
“الْيَوْمَ، إِنْ سَمِعْتُمْ صَوْتَهُ (أي صوت الله)، فَلاَ تُقَسُّوا قُلُوبَكُمْ“ عبرانيين 7:4
خاطر النهاية قربت وفمّا برشا نبوات على نهاية العالم قاعدة تصير حرفيّا. ربي قدملك محبّتو ودفع الثمن متع خلاصك “لأن أجرة الخطية هي موت“ والحكم هذا يعني موت الخاطي اما ربي بمحبتو اعطانا المسيح اللي جاء ومات وقام في النهار الثالث باش يقيمك معاه من معاصيك وحياتك القديمة ويحل قدامك باب السما.
ما تستخفش بلطف ربي وصبرو… ما تستهينش بمحبتو… برشا قبلو المسيح في حياتهم ولقاو السلام والراحة والرجاء اللي يلوج عليه كل انسان وانت زادا مميز ومحبوب عند ربي والمسيح قال: ” من يُقبل إليّ لا أُخرجه خارجاً”.
اطلب منو بكل ثقة وصدق انو يرحمك ويغفرلك ذنوبك واقبل انو يكون السيد في حياتك ووقتها تكون انسان مولود من جديد خاطر المسيح هو ينبوع الحياة..
اقرا الانجيل واعرف اكثر السلام اللي يعطيه رئيس السلام :
“سَلاماً أَتْرُكُ لَكُمْ. سَلاَمِي أُعْطِيكُمْ. لَيْسَ كَمَا يُعْطِي الْعَالَمُ أُعْطِيكُمْ أَنَا. فَلاَ تَضْطَرِبْ قُلُوبُكُمْ، وَلاَ تَرْتَعِبْ.” الإنجيل بحسب يوحنا 14: 27