كلمة فيزا تعني تأشيرة تسمح لحاملها انّو يدخل بلاد ويقعد فيها لفترة معينة.
سمعت برشا توانسة يقولو انّو اللّي يولّيو مسيحيين ياخذو الفيزا. نحب اليوم نقولك انو هذا صحيح!
أما ماهيش فيزا شينغن والا فيزا لامريكا، الفيزا اللي ياخذها الشخص اللي يقبل المسيح في حياتو هي فيزا اقوى واهم من هذوما. هي فيزا يدخل بيها لملكوت الله ونزيدك خبر اخر مزيان… الفيزا هذي متوفاش المدة متاعها! واسمها الحياة الابدية!
انا شخصيا ماعمري ما سمعت والا عرفت واحد خذا فيزا لبلاد غربية والا عطاوه جنسية اخرى جست على خاطرو ولاّ مسيحي أما اللي نعرف برشا ناس حياتهم تبدلت بالكامل من وقت ما خذاو جنسية جديدة وهي الجنسية السماوية كيما قال عليهم الانجيل.
جنسية جديدة
الانجيل علّمنا اللّي كل واحد يقبل المسيح في حياتو ويقبل الخلاص اللي عملو على خاطرو يولّي “مواطن سماوي”
“أَمَّا نَحْنُ، فَإِنَّ وَطَنَنَا فِي السَّمَاوَاتِ الَّتِي مِنْهَا نَنْتَظِرُ عَوْدَةَ مُخَلِّصِنَا الرَّبِّ يَسُوعَ الْمَسِيحِ” كتاب الانجيل: فيلبي 3: 20
المسيحيين المؤمنيين هو مواطنين في مملكة الله. وربي هو الملك والسيد متاعهم؟
احنا كمسيحيين توانسة نحبو بلادنا وننتميو ليها. توانسة كيما الناس الكل في كلامنا وعاداتنا وديما نصلّيو من اجل تونس وسلامها. اما رجاءنا واملنا الوحيد هو في الله أكاهو. هذاكا علاش منخافوش ومندخلوش بعضنا حتى وقتلّي تصير أزمات ومشاكل في البلاد على خاطر كل شي ينجم يتبدّل اما الله ما يتغيّرش مهما تكون ظروفنا وهو ضمنلنا حقوق وميزات في مملكتو للابد,
ثقافة مملكة الله
وقت نقولو مواطن في مكان معيّن هذا يعني اللي الشخص هذا يعيش بحسب الثقافة والقوانين متع البلاد اللي ينتميلها. والمسيحي الحقيقي ينتمي لمملكة الله ويحضع لقوانينها اللي هي كيما علّمنا السيد المسيح في الانجيل محبّة ربّي، محبّة الاخر وخدمتو ومحبّة الاعداء والاهتمام بالفقير والمريض.. الحياة في تواضع وصدق وطاعة السلطات وطاعة كلمة ربي اللي تبعدني على المعاصي.
الفيزا اللي عندنا مافيهاش تاريخ انتهاء
الانجيل يقولنا
مَنْ يُؤْمِنْ بِالاِبْنِ، فَلَهُ الْحَيَاةُ الأَبَدِيَّةُ. الانجيل بحسب يوحنا 3: 36
وقت اللي تقبل المسيح كمخلّص وفادي لحياتك انت ضمنت حياة ابدية مع الله. حياتك الروحية وقتها تبدا وباش تدوم للأبد. حتى وقت اللي تموت جسديّا انت باش تكون معاه في السماء وتتملا بالفرح الابدي بحضورو. الحياة الابدية تنجم تبدا اليوم معاك. ومفمّا حتى حد ينجم يسرقها منك. وقتها معادش باش تخمّم انت وين ماشي بعد ما تموت. على خاطر ربي ضمنلك مكان معاه للابد.
لو عندك سؤال او استفسار اكتبلنا في الفاسبوك وفما شكون يتواصل معاك