حكايتي بدأت من 2007 وقتها كنت نقرأ في الكولاج، لاحظت انو ماما تتفرج برشا في القنوات المسيحية كيف نسالها تقلي نحب نعرف واكاهاو
وقتها كنت نصلي ونبطل اما نخاف ربي… كانت الحكايه ماهيش مقلقتني برشا نقبل رأي امي عادي كيف تبدأ تحكيلي عالمسيح والتسامح والحب الي فيه. كنت نحب نعرف المسيح هذا شنوا اما نحس حاجه تمنعني خاطري كيما قلتلكم نخاف من ربي.
في 2011 قررت نلبس الحجاب أما زادا تبدلت برشا وليت متعصبه. امي لبستها الحجاب غصبا من كثر ما مرجتها. وصلت حتى الاغاني لا، و حتى فكرت بأني نلبس الي يسموه لباس شرعي في بالي الي هذاكا هو الصحيح والي باش يمنعني من عذاب ربي.
و ديما عرك انا وامي ونقلها انت كافره وتشرك بربي ونوصل للتجريح وامي تفهمني بالسياسه وانا مخي صيي متبلوكي ما نفهم بعدو شي كنت ديما في حالة خوف ورعب من الموت،
الإسلام ما عطانيش السلام الي ديما يحكيو عليه، بعد بديت بالشويه نرجع كيما قبل وتحررت شوي. وقتها راجعت روحي بشنيا فادني الخمار قبل كل شي بحثت برشا عليه و فكرت باش انحيه بعد ما قريت فتاوي وكل شي كنت الوج على أقل دليل يقول انو الخمار موش فرض خاطرني نخاف من ربي اكاهاو، حاصيلو نحيتو أما مازلت رافضه المسيح وما خممتش فيه جملا،
كانت امي تحكيلي على معجزات صارولها كيما البيت الي ضوات وقتلي صلات لربي وبكات وقتلو يا رب كانك موجود بلحق أثبت ذاتك ، من وقتها أمي صيي بعد حيرة سنين وصلت للطريق الصحيح،
بديت نفهم وعينيّا تتحل على برشا حاجات وكان فمّا اصحاب امي مسيحيين يصلّيو من اجلي وانا ما فيباليش. كنت حايرة وامي طلبت مني نحكي مع بعض الاخوة المسيحيين في التلفون ماللول قلتلها لا وبعد قلتلها ميسالش نحب نحكي معاه عندي أسأله، بدأ يصليلي وانا وليت نبكي حسيت براحة كبيرة تشديت للحكايه وقعدت ليل نهار وانا نبحث ونلوج وبديت نتعمق اكثر في الاديان و لقيت فرق كبير برشا
في الآخر قبلت المسيح في حياتي خاطر هو قال انتي بنتي وانا نحبك وعلى خاطرك اتصلبت كلام خلاني نولي بنيا أخرى نحب نصيح ونقول للناس الكل راني اخترت الحق فيقو من سباتكم،
نحب نشكر اخواتي المسيحيين اللي عاونوني برشا وحبوني ناس تصليلي و بلي نحكي ما نجمش نوصف حبهم ليا
تقربت من ربي برشا الخوف الي عندي الكول ذاب ، فرحانه وطااايره بالفرحه ، المجد للرب الواحد الأحد ختارني انا وامي في مكان بعيد ما نعرفو فيه شي على المسيح،
كيف كنت صغيره نصلي ونقول يا رب تهدي المسيحيين كيف كبرت تقلبت الدعوه و ربي هداني انا ، نحب نقول لكل تونسي راني نحبكم وديما نصليلكم،
الله يعطيكم الفرصه والوقت و تتنورو كيف ما تنورت، حتى انا كنت كيفكم نخاف من اني نطسأل و نبحث خاطر حرااااام ،كل الي عملتو اني بعد سنين من التجاهل قررت نحل عينيا وذنيا و نسأل ونقارن،
في المسيح لقيت انو لكل سؤال جواب مش كيما كنت كل شيء لا رد بالك ما تسألش. حكايه موش صعيبه كيف ماكنت نتوقعها.
* غمض عينيك و صلي وقول يا ربي كانك موجود اثبتلي ذاتك ، وربي ما يرفضلكش طلب خاطر ربي قال انو يحبنا ومشيئتو انو يهدينا وينورنا ، نحبكم وبقدر حبي ليكم نصليلكم*