fbpx

يسوع هو الحق

برشا يقولو بأعلى صوتهم انّهم ماشين في السكة الصحيحة ويفكرو انّو أي حد مختلف عليهم وميؤمنش كيفهم هو على ضلالة كبيرة. أما برشا يعيشو في سراب كبير وهوما ما فيبالهمش:

“رُبَّ طَرِيقٍ تَبْدُو لِلإِنْسَانِ قَوِيمَةً وَلَكِنَّ عَاقِبَتَهَا تُفْضِي إِلَى دُرُوبِ الْمَوْتِ” أمثال 25:16

الحاجات اللّي نشوفهم حق بالنسبة ليّا ماهوش بالضرورة حق بالنسبة ليك واللّي هو حق في بلاصة ووقت معيّنين ماهوش بالضرورة حق في وقت وبلاصة أخرى أما هذا ما يعنيش انّو الحق متغيّر أما إدراكي وفهمي للحق هو اللّي يتغيّر. مثال من وقت قريب كان الناس يخمّمو انّو الشمس تدور حول الارض ومن بعد اكتشفنا انّو مش هذي الحقيقة. من أوّل الخلق كانت الارض تدور حول الشمس حتّى لو أنا وانت مكنّاش نشوفو هذا ومحناش مدركينو أما الحق يقعد مطلق مش مربوط بقناعتي بيه وإلاّ لا.

برشا يقولو أنا نعرف الحق وإلاّ عندي الحقيقة أما واحد أكاهو على وجه الارض هذي قال كلمة غريبة ومختلفة وتخلّي الشخص اللّي بالحق باحث ياقف وقفة تأمّل وتساؤل. الشخص هذا قال أنا هو الحق. شكون ينجّم يقول انّو هو الحق، مش على حق وإلاّ يعرف الحق وإلاّ عندو الحق. لا أنا هو الحق. الشخص هذا هو يسوع المسيح  اللّي قال:

“أَنَا هُوَ الطَّرِيقُ وَالْحَقُّ وَالْحَيَاةُ. لاَ يَأْتِي أَحَدٌ إِلَى الآبِ إِلاَّ بِي” الانجيل بحسب يوحنا 14: 6

فمّا معايير ثابتة نجّمو نبنيو عليها أحكامنا. أي حاجة قالها المسيح قالها بالقول والفعل. وقتلّي قال أنا هو الحياة، المسيح أثبت الكلام هذا وقت اللّي قام مالقبر. كان بقى المسيح جامد في قبرو وقتها تولّي أي حاجة قالها انّو هو الحياة وكل وعودو للناس انّو اللي يؤمن بيه يحيا وميموتش ميكون ليها حتى معنى أما أفعالو أكّدت صدق كلامو.

“فَتَمَلَّكَهُنَّ الْخَوْفُ وَنَكَّسْنَ وُجُوهَهُنَّ إِلَى الأَرْضِ. عِنْدَئِذٍ قَالَ لَهُنَّ الرَّجُلاَنِ: «لِمَاذَا تَبْحَثْنَ عَنِ الْحَيِّ بَيْنَ الأَمْوَاتِ؟ إِنَّهُ لَيْسَ هُنَا، وَلَكِنَّهُ قَدْ قَامَ! اذْكُرْنَ مَاكَلَّمَكُمْ بِهِ إِذْ كَانَ بَعْدُ فِي الْجَلِيلِ فَقَالَ: إِنَّ ابْنَ الإِنْسَانِ لاَبُدَّ أَنْ يُسَلَّمَ إِلَى أَيْدِي أُنَاسٍ خَاطِئِينَ، فَيُصْلَبَ، وَفِي الْيَوْمِ الثَّالِثِ يَقُومُ».” الانجيل بحسب لوقا 24: 5-7

التاريخ الكل يشهد انّو المسيح “الحق” كل حاجة نادى بها وعاشها وقالها على روحو هي صحيحة ودقيقة وكيما مكتوب في الانجيل انّو “لم يفعل شيئًا ليس في محلّه” الانجيل بحسب لوقا 23: 31

الحق هو اللّي يكشف حقيقة الاشياء ويورّيهالنا هذاكا علاش المسيح هو الحق على خاطرو كشفلنا قلب الله المحب وورّانا قداستو وحكمتو وقوتو ونعمتو.

“وَتَعْرِفُونَ الْحَقَّ، وَالْحَقُّ يُحَرِّرُكُمْ” الانجيل بحسب يوحنا 8: 32