fbpx

زعما شنوة الكتاب اللي يؤمنو بيه المسيحييين؟

الكتاب اللي يؤمن بيه المسيحييون اسمو الكتاب المقدس والمسيحي يعيش ويطبق الوصايا والتعاليم اللي ربي عطاهم في الكتاب هذا. في الكتاب هذا فمّا مجموعة الأسفار اللّي ربي أوحاها للأنبياء متاعو على الاف السنين واللّي تحكي من أول خلق العالم حتّى لعلامات وشنوة باش يصير في اخر الدنيا وزادا فيه التعاليم الروحية

الكتاب المقدس متنوع في الكتابات متاعو فمّا النثر وفمّا الشعر وفمّا كتب تاريخية وقصص وحكم وأمثال… والكتاب المقدس هو مصدر الايمان المسيحي وفيه كل شيء يخص الايمان والحياة الروحية وهو الغذاء الروحي متع المؤمن. ركيزة الكتاب المقدس هو محبة ربي للانسان ومحبة الانسان لربي ولخوه الانسان.

الكتاب المقدس فيه 66 سفر (كيما نقولو سُوَر بالنسبة للقران) وهو مقسوم لقسمين:

  • العهد القديم: فيه 27 سفر وهو فيه التوراة والمزامير (اللّي يتسمّاو الزابور في الاسلام للنبي داود) وكتب الانبياء اللّي جاو قبل المسيح وتكتب باللغة العبرية.
  • العهد الجديد ولاّ الانجيل اللّي فيه البشاير الاربعة والرسايل وسفر الرؤيا وتكتب باللغة اليونانية.

شكون اللي كتب الكتاب المقدس؟

ماهوش انسان اللي كتب الكتاب المقدس من تفكيرو ومخيلتو أما ربي أوحى لناس معينة تقريبا 40 واحد من الانبياء والتلاميذ باش يكتبو الكتاب. ورغم اللي الناس هذوما مختلفين في كل شيء وكل واحد من بلاصة وفي فترة متع وقت دامت 1600 سنة أما الكتاب المقدس رسالتو من الاول للاخر واحدة متغيرتش وهي تحكي على محبة ربي والحل اللي يعملو الانسان باش يكون في علاقة مع ربي.

وقتلّي نقراو العهد القديم نشوفو كيفاش ربي خلق الارض والسما والانسان وكيفاش غلطو وكيفاش الانسان ولاّ يغلط ويعصي ربي حتى من غير ارادتو. نشوفو زادا وعد ربي انو ينقذ الانسان ويخلّصو من النتايج متع الخطايا والذنوب متاعو. والعهد القديم مليان زادا بالنبوات على السيد المسيح اللي باش يحقق الوعد هذا حتى طريقة ولادتو من عذراء تذكرت في العهد القديم اللي تكتب ميات السنين قبل ما يجي المسيح. وفي العهد الجديد نلقاو تحقيق الوعد واللي صار الانسان يتميّز بيه وقت اللي يقبل الخلاص هذايا من ربي.

لو تحب تتعرف على الكتاب المقدس وتعرف كلمة ربي ليك تنجم تتواصل معانا بالفاسبوك والا تنزل على اتصل بنا في الموقع ونحنا نوفرولك الكتاب مجانا وين انت.