fbpx

المسيح مخلّص وإلّا بطل؟

في برشه مرّات وقت الّي نحكي على شخص الرّب يسوع المسيح كيف ما هو مكتوب عنّو في الإنجيل، ونوصل لحدث الصليب نلقى برشه معارضة من النّاس الّي قاعدين يسمعو فيّ، وبالطبيعة يرجعوا للنّص الديني الّي يؤمنو بيه ويحاولو يقنعوني انّو المسيح ما تصلبش وراهو شبّه لهم أكهو، وراهو الّي تصلب في بقعتو هو شخص آخر، وراهو ربّي خلّى الشخص هذا ولّى يشبهلو باش يمنّع المسيح، وثمّه اشكون يقول الشخص هذا هو يهوذا الإسخريوطي وناس أخرين تقول الّي هو بطرس الرّسول إلخ. نرجع بيهم للنّبؤات الّي تقالت على صلب المسيح في سفر إشعياء وسفر زكريا وسفر المزامير وغيرها من أسفار الكتاب المقدس ومن بعد نرجع بيهم حتّى لكتابات اليهود الي كانو معاصرين لحدث الصلب كيما يوسيفوس ونرجع لبعض الكتابات الرّومانية وكتابات أباء الكنيسة ونرجع حتى للصّور متاع اللّقيات الأثرية وغيرها من الأدلّة، وحتّى كتشرحلهم إنّو ربّي ما يليقش بيه باش يكذب على النّاس ويخدعهم ويحطّلهم واحد آخر في بقعة المسيح يصلبوه ويقعدو مئات السنين وهوما مصدقين الكذبه هذي. وقدام السيل هذا متاع الأدلّة المفروض إنّو الانسان يراجع روحو شويّه، لكن بالحق النّافع ربّي.

 قعدت نسأل في روحي زعمه أعلاش النّاس ما تتفاعلش مع سيل الأدلة هذي؟ زعمه لها الدرجة العقلية متاعنا ترفض ما هو منطق في مقابل ماهو عقيدة؟ هذا ممكن لكن لقيت زادا سبب آخر يخلّي التّونسي يرفض قصّة الصليب، والسبب هو فكرة البطل المرسومة في ذهنه. 

فكرة البطل هي فكرة مهمه جدّا بالنسبة للفرد وبالنسبة للمجتمع زادا، فكرة البطل هي مقياس يعاونّا باش نقيمو السّلوك ونفرزو بين السلوك الباهي والسلوك الخايب، وهي الّي تلهم الإنسان كيفاش يلزمو يتصرّف وكيفاش يلزمو يكون وكيفاش يلزمو يعيش، كل واحد فينا يحب يكون البطل بين أصحابو وفي عائلتو وفي أي مجموعة ينتمي ليها.

فكرة البطل تبنيها مجموعة من القيم الإجتماعية والنفسيّة، اما زادا مجموعة متاع إحتياجات أخرى، البطل متاع العصور القديمة هو هاك الراجل الصنديد الطويل العريض الخشين صاحب القوة الجسدية الرهيبة الي يقضي على الأعداء وينصر المجموعة الّي ينتمي ليها (عنتر بن شداد، علي شورّب …).

البطل في عصرنا الحالي هو لاعب كرة القدم النّاجح الي يمتّع الجمهور بفازاتو وإلاّ الممثل والا الممثله إلّي يخدمو في هوليود وإلا عارضة الازياء رشيقة القوام وإلّا ملكة جمال … إلخ

وقت الّي جاء المسيح للأرض في المجيء الاول متاعو ما كانش بطل بالمعنى القديم متاع البطولة، لا هز سيف ولا قتل عباد ولا فك أرض ولا حرّر اليهود من الاستعمار الرّوماني كيف ما كانو يستنّاو. تقول كلمة ربّي:

”قصبة مرضوضة لا يقصف وفتيلة مدخنة لا يطفئ حتى يخرج الحق الى النصرة.“ متى12: 20

وحتّى وقت الّي جبد واحد من التلامذة متاعو سيف باش يدافع عليه وقت الّي حبّو يشدّوه باش يحاكموه قالّو:

«رد سيفك الى مكانه. لان كل الذين ياخذون السيف بالسيف يهلكون!“  متى26: 52

 وعلى خاطر ما كانش بطل في نظرهم ما قبلوهوش  وما عرفوش إنّو إلههم وملكهم الّي خرّجهم من العبوديّة متاعهم في أرض مصر في العهد القديم.

ووقت الي تحكي على المسيح في مجتمعنا الحالي، الناس الي تسمع في الحكاية متاعو لا ترى فيه صاحب فلوس ولا صاحب نفوذ ولا صاحب عضلات ولا عندو ديار ولا كراهب ولاهو لاعب كرة قدم مشهور ولاهو ممثّل وإلّا عارض ازياء … إلخ 

المسيح في حد ذاته يقول عن نفسه:

«للثعالب اوجرة ولطيور السماء اوكار واما ابن الانسان فليس له اين يسند راسه».“ متى8: 20

بمنظورنا الأرضي البشري المحدود، المسيح ما عندوش البروفيل متاع البطل لا من منطلق التصويرة متاع البطل في العصور القديمة ولا في العصور الحديثة، هذاك أعلاش القصّة متاع ولادته وموته وقيامته من الموت ما تجذبناش، ونلوجولو على تصويره اخرى فيها أكثر جاذبية كيما شبّه لهم.

في الوقت الّي العالم القديم وإلّا الحالي يمجّد الأثرياء والأقوياء والمشهورين والمتكبرين نلقاو المسيح المتواضع، الّي تقول عليه كلمة ربّي :

”فليكن فيكم هذا الفكر الذي في المسيح يسوع ايضا: الذي اذ كان في صورة الله، لم يحسب خلسة ان يكون معادلا لله. لكنه اخلى نفسه، اخذا صورة عبد، صائرا في شبه الناس. واذ وجد في الهيئة كانسان، وضع نفسه واطاع حتى الموت موت الصليب.“ فيلبي2: 5 ـ 8

تولد ملك ملوك الارض في مكان متواضع أشبه بكوري وتقمّط وتحط في معلف متاع بقر، عاش فقير وهو الّي غنى برشه عباد

”فانكم تعرفون نعمة ربنا يسوع المسيح انه من اجلكم افتقر وهو غني لكي تستغنوا انتم بفقره.“ 2 كورنثوس8: 9

ومن بعد مشى للصليب باش يدفع ثمن خطايانا ويغفر آثامنا ويصالحنا مع الله، تقول كلمة ربّي :

”ولكن الله بين محبته لنا، لانه ونحن بعد خطاة مات المسيح لاجلنا. فبالاولى كثيرا ونحن متبررون الان بدمه نخلص به من الغضب! لانه ان كنا ونحن اعداء قد صولحنا مع الله بموت ابنه، فبالاولى كثيرا ونحن مصالحون نخلص بحياته! وليس ذلك فقط، بل نفتخر ايضا بالله، بربنا يسوع المسيح، الذي نلنا به الان المصالحة.“ رومية 5: 8 ـ 11

الحاجة الي يلزمنا نفهموها إنّو الصورة الذهنية للبطل هو تعبير عن إحتياجاتنا الدنيوية وتعبير عن عقدة النقص الي فينا، البطل هو الصورة العكسية متاعنا، البروفيل متاع البطل بالنسبة لإنسان غني وقوي ومشهور موش نفس البروفيل متاع إنسان فقير وضعيف ومحقور.

البطل يصنعوه النّاس كتعبير عن كرههم للضعف والعجز والفقر والقبح أما المسيح جاء للارض باش يعطي قوه للإنسان في عوض العجز وغنى في عوض الفقر وجمال في عوض القبح.

البطل يبقى بطل طالما الناس مازالوا بعاد عليه في عناصر التفوّق متاعو على خاطر اذا وصلوا كيفو هو ماعادش بطل، أما المسيح جاء باش يجعل كل من يؤمن بيه بطل.

وانت يا الّي تقرى في المقال هذا، تحتاج بطل يعبّر عن النقص الّي فيك؟ وإلّا تحتاج مخلّص يكمّل النّقص الّي فيك، ويجعل منك بطل؟

لو عندك سؤال على شخص الرب يسوع المسيح والّا على كلمة الله في الإنجيل تنجّم تتواصل معانا بالماسنجر على صفحة الفايسبوك Elmassihfitunis