وحده من أهم مميزات الإيمان المسيحي هو كونو يمثّل رحلة تغيير، كل الدّيانات في العالم تقوم على زوز عناصر: العقيدة والممارسة الّي هي الطقوس، أوّل ما يعتنق الشخص العقيدة متاع أي دين يتسمّى على الدين هذاك ومن بعد درجة الممارسة متاعو هي الّي تحدّد مقدار التديّن متاعو. في الإيمان المسيحي مجرّد الإقتناع بالعقيدة المسيحيّة ما يجعلش من الإنسان مؤمن مسيحي، والتديّن المبني على مجموعة من الممارسات (طقوس وعبادات) ما عندو ما يزيد وما ينقص. على خاطر القضيّة قضيّة تغيير. وقت الّي يقبل الإنسان يسوع المسيح كرب ومخلّص ليه ويقبل العمل الكفاري متاعو على الصّليب باش يشفع فيه وينقذو من الموت الأبدي يسكن فيه الله بالروح القدس، وهذا الّي قصدو المسيح في حوارو مع رجل دين يهودي وقت الّي قالو: «الحق الحق اقول لك: ان كان احد لا يولد من الماء والروح لا يقدر ان يدخل ملكوت الله.» يوحنا3: 5
ومن بعد تبدى رحلة التغيير، في رحلة التغيير هذي يتغيّر الإنسان للأحسن في طريقة التفكير متاعو في نظرتو للناس وفي نظرتو لله، تتنحّى منّو الأنانيّة ويولّي الله هو المركز متاع حياتو، يحيا لله ويموت لله ينكر ذاتو وكل قرار ياخذو أو عمل يعملو يولّي القصد منّو تمجيد الله، وهذا الّي تقولو كلمة ربّي: «ولا تشاكلوا هذا الدهر، بل تغيروا عن شكلكم بتجديد اذهانكم، لتختبروا ما هي ارادة الله: الصالحة المرضية الكاملة »رومية12: 2
الهدف من التغيير هذا هو إنّو المؤمن المسيحي يوصل لدرجة يشبه فيها يسوع المسيح، وقت الّي كان آدم في جنة عدن مع ربّي كان على صورة الله، لكن وقت الّي أخطأ صورة الله فيه تشوهت وخرج من محضر الله على خاطر الإنسان الخاطئ ما ينجمش يكون في محضر الله القدوس، هذاك أعلاش ما ينجم الإنسان يرجع لمحضر الله إلّا ما يسترجع صورة الله الي فقدها وهذاك أعلاش كلمة ربّي تقول:« ونحن جميعا ناظرين مجد الرب بوجه مكشوف كما في مرآة نتغير الى تلك الصورة عينها من مجد الى مجد كما من الرب الروح» 2كورنثوس3: 18
إذن القضيّة موش قضيّة قناعات، الحكاية وما فيها هي كيفاش تسترجع صورة الله فيك، إذا ما تعرفش أشنية هي صورة الله في الإنسان شوف تصويرة يسوع المسيح في الإنجيل، أطلب غفران الله لذنوبك على أساس موت المسيح في عوضك على الصليب وأطلب من الله إنّو يملاك بروحه القدوس وقتها تسترجع تصويرة الله فيك وتولّي عندك الإمكانية إنك تكون في محضر الله.
إذا تحب تحكي مع مؤمن مسيحي يشرحلك اكثر الإيمان المسيحي ويجاوبك على أسئلتك تواصل معانا على الميسنجر.