الاخوة كلمة تحمل برشا معاني، منها معنى انو يكون عندك سند معنوي وسند مادي، تحمل زادة معنى عندك حميّه كيف ما نقولوها بالدارجة. عندك اخوة معناها عندك مع شكون تتقاسم الفرح والحزن، لخواتك تفرغ قلبك وتحكي همك، ومعاهم تضحك ضحكة من”عروش قلبك” ومعاهم ترجع بيك الدنيا لأيامات صغرك … عندك اخوة معناها عندك شركاء في حياتك. خوك والا اختك هو اللي يتفقدك بتلفون الا حتى مساج خاطر جيت على بالو في النهار اذاك، وقلبو توغوش عليك “بيكش يا وخي؟” ،”شنوه احوالك يا اختي؟،” “واشك بنت امي؟” “، شنهي حالك حنان ؟” نسالو على خواتنا بلهجاتنا المختلفة من الشمال للجنوب وأهاوكا كان واتت نتقابلو في دار العيلة حتى مريرة في الشهر. وقت الي امنت بالمسيح وقريت الكتاب المقدس كنت كل ما نغوص فيه اكثر كل ما نزيد نكتشف مقاصد الخالق من خلق الانسان. في كلمتو بلّغ وصاياه اللي فيها بالحق حكمة خالق عارف بحاجات خلقه سد كل الثغرات اللي تمس الانسان، وتخليه يعيش مرتاح لو تبع كلمتو. هذاك علاش ثمة اجماع على انو الكتاب المقدس هو كلام الله للانسان. أبراهام لنكولن محرر العبيد في امريكا قال:”الكتاب المقدس أحسن كتاب منحه الله للبشر”
مفهوم الاخوة في الكتاب المقدس عميق ومهم برشا. انك تحب خوك الانسان كيف ما تحب روحك هي ثاني اعظم الوصايا تجي مباشرة بعد وصية محبتنا لربنا يقول الرب ما ثماش محبة حقيقية لله إذا ماتوجدتش محبة حقيقية لأخيك الإنسان، كيف سالوه:
"يا مُعَلِّمُ، ما هي أعظمُ وصِيَّةٍ في الشَّريعةِ؟" فأجابَهُ يَسوعُ: “أحِبَّ الرَّبَّ؟ إلهَكَ بِكُلِّ قَلبِكَ، وبِكُلِّ نفسِكَ، وبكُلٌ عَقلِكَ”. هذِهِ هيَ الوصِيَّةُ الأولى والعُظمى. والوصِيَّةُ الثّانِـيةُ مِثْلُها: أحِبَّ قَريبَكَ مِثلَما تُحبُّ نفسَكَ. (مت 22: 36-39).
في المسيحية الكنيسة هي رمز اتحاد الاخوة في جسد يسوع.
''هَكَذَا نَحْنُ الْكَثِيرِينَ: جَسَدٌ وَاحِدٌ فِي الْمَسِيحِ وَأَعْضَاءٌ بَعْضاً لِبَعْضٍ كُلُّ وَاحِدٍ لِلآخَرِ''.رومية:5:12.
وبينوالمسيح في علاقتو بتلامذتو وعلاقتو بعامة الناس وأعمالو اللي كان يعلم بيها. تلامذتو هما بدورهم واصلوا العمل بيها حتى بعدو، مثال الرسول بولس كيف كان يبشّر كان يستعمل لفظ الاخوة :
"عَلَى أَنَّنِي أَيُّهَا الإِخْوَةُ، أُنَاشِدُكُمْ بِاسْمِ رَبِّنَا يَسُوعَ الْمَسِيحِ أَنْ يَكُونَ لِجَمِيعِكُمْ صَوْتٌ وَاحِدٌ وَأَنْ لَا يَكُونَ بَيْنَكُمْ أَيُّ انْقِسَامٍ. وَإِنَّمَا كُونُوا جَمِيعاً مُوَحَّدِي الْفِكْرِ وَالرَّأْيِ ِ." 1كورنثوس 1: 10
عندنا مثل تونسي يقول” البطن صباغة دباغة”. اي صحيح ما عندناش نفس الشبيهة من برا أما عنا نفس الشبيهة من داخل، الكنيسة هي الرحم اللي يلمدنا، احنا” اخوة شقه” في الروح القدس اللي ساكن فينا وأخلاق المسيح اللي نعملو بيها ومحبتنا ليسوع وايماننا بيه كمخلص وفادي. مقرنا القار بشركة الروح ويترأسنا سيدنا وملكنا المسيح. كل أسبوع نتلمو مع خواتي في دار بابا السماوي نقراو كلمة ربي ونفهمو اش قال نصليو مع بعضنا ونصليو على خاطر بعضنا وعلى خاطركم وعلى خاطر اخواتنا اللي مازالت كراسيهم فارغة نصليو من اجل خلاص النفوس ونصليو من اجل بلادنا، من الكنيسة نستمدو القوة باش نتغلبو على الصعاب اللي تواجهنا بشكل يومي. قلوبنا صافية على بعضنا، نتقاسمو الضحكة و الدمعة، ناكلو ونشربو مع بعضنا، نطمنو على أحوال بعضنا في الكنيسة نحسو بنعمة حضور ربي بيناتنا. نحبو بعضنا… وروح بابا تباركنا.
ومَا أَحْسَنَ ومَا أَبْهَجَ أَنْ يَسْكُنَ الإِخْوَةُ مَعاً (فِي وِئَامٍ). مزمور 133: 1
لو عندك سؤال والا استفسار والا طالب توضيح على الايمان المسيحي والا على آيات في الكتاب المقدس، تنجم تتواصل معانا على الماسنجر متاع صفحة الفايسبوك متاعنا Elmassihfitunis