أنا نصوم على خاطر معرفتي لمحبة ربي ليّا، التضحية إلي قام بيها على خاطري، و طيبة ربي تجاهي تخليني نحب نقرب منو أكثر.
نحب نتعمّق في معرفتي لربّي على قد ما نجّم. نحب نبعد على كل تشويش وناخو وقت نعديه مع ربي، نشاركو فيه الّي في قلبي، ونسمع فيه لصوتو.
كانت عندي مشكلة إنّي نجّم نسامح النّاس الّي جرحوني قبل، الصيام عاوني نتحرّر من القيد هذا. ولّى عندي سلام و قلبي تشفى،.
الصيام عاوني إنّي نحب غيري أكثر. عديت برشا وقت نصلّي ونصوم من أجل زواجي و ربّي بنى وصلّح فيه.
صلّيت من أجل أولادي. وهوما قاعدين يكبرو في علاقتهم بربي. صلّيت من أجل الظروف الي تعدّاو بيها أصحابي. صلّيت من أجل خواتي التوانسة و الصعوبات إلي قاعدين نتعدّاو بيها في المجتمع متاعنا، ربّي الي هو أب محب لينا الكل، هو الجواب الوحيد لمشاكلنا.
الصيام ماهوش فرض عليّا وموش باش يربّحني نقاط عند ربّي. عندي حريّه في الصيام. ساعات نصوم وحدي وما يسمع بيّ حد في الدّار. ساعات نصوم مع ناس أخرين. ساعات نصوم لوقت قصير ومرّات أخرى نصوم لوقت طويل، الصيام معناها إنّي نحط ربي أولوية في حياتي و نطلب منّو إنّو يخلّيني نشبهلو أكثر. نحب إنّو ربي يكبر في داخلي. نتعلّم إنّي نحب اكثر، نسامح أكثر، ونتصرف بالقداسه والنّعمه.
نحب إنّو ربي يغيّر فيّا بالطريقه الّي مانجّمش نعملها وحدي. نحب نعبّرلو على إمتناني الشديد ليه وإشتياقي لعودة المسيح وللحياة الأبدية في محضره.
”ومتى صمتم فلا تكونوا عابسين كالمرائين فانهم يغيرون وجوههم لكي يظهروا للناس صائمين. الحق اقول لكم: انهم قد استوفوا اجرهم. واما انت فمتى صمت فادهن راسك واغسل وجهك لكي لا تظهر للناس صائما بل لابيك الذي في الخفاء. فابوك الذي يرى في الخفاء يجازيك علانية“. متى6: 16 ـ 18
وقت إلّي نصوم نضعف جسديا أمّا شهوة قلبي هي إني نكبر روحيًا في علاقتي مع ربي( كان تحب تعرف أكثر آش معناها تكبر في علاقتك مع ربي ؛ اتصل بينا).